المستشفيات الخاصة !!

,

مشكلتنا في الكويت وفي أغلب دول الخليج هي في عدم اهتمام الحكومة بالمرافق الصحية واهمالها مع توفر الميزانية والقدرة على تطوير وتأهيل المرفق الصحي في الدولة.

وبالكاد تجد مستشفى نظيف ومرتب وانا على يقين أنك اذا وجدت هذا النوع فستجد فوق كل حائط ( تبرع فلان الفلاني جزاه الله خير الجزاء )

.

لكي تستطيع العلاج في المستشفيات الحكومية يجب اتباع الآتي :

1- تذهب للمستوصف تدخل على الدكتور يجري الحوار التالي :

الدكتور : تفضل في إيه ؟

أنت : دكتور أحس بألم في المعده من 3 ايام .

الدكتور : يا أستاز أبوفلان خفف من الاكل شوي .. تفضل !! (ورقة فيها مايسمى بالعلاج )

أنت : تشوف الورقة ( بندول حتى لو فيك سرطان – باسكو بان للمغص حتى لو فيك قرحة – مضاد حيوي تاكل اربع حبات لأنه مخصص للأطفال أصلا )

بعد ثلاث ايام نفس الألم ماراح .

ترجع للمستوصف بتاع البندول تاخذ ورقة تحويل للمستشفى تروح المستشفى موعد بعد شهر ولازم الساعه 6 الصبح انت عند الباب عشان تلحق ع الرقم .

وبعد الشهر إسمك في صفحة الوفيات !

.

طيب تبي تختصر الطريق تروح للمستشفيات الخاصة .

تدخل الاستقبال تفضل عند الكاشير تدفع عشرة اذا عندك ملف , تقعد ع الكرسي تدفع 3 دنانير تعطس بالممر تدفع دينارين 🙂

تدخل ع الدكتور طبعا نظرة الدكتور لك تلخصها هاذي الصورة .

.

.

يشوفك خزينة فلوس ويدور الرقم السري

يجري الحوار التالي :

الدكتور : تفضل سلامات يابوفلان في إيه ياباشا ( مع ابتسامة خفيفة ليظهر لك ضرس الذهب عيار 24 )

أنت : والله دكتور فيني كحه قوية مو راضية تروح .

الدكتور : افتح صدرك .. اها يا بوفلان يمكن حساسية يمكن ربو يمكن الشعب الهوائية يمكن التهاب لازم فحوصات !!

أنت : طيب مو مشكلة .

الدكتور : تفضل ( ورقة فحص دم – ورقة اشعة للصدر – ورقة تحليل بول – ورقة سونار ) 🙂

بعد هالأوراق تفكر بالفيزا وتفكر بالكي نت وتشوف جم بالبوك وتقعد تكسِّر حساباتك وتنسى المرض .

بعد الفحوصات يعطيك دوا شراب ومضاد حيوي بس اقوى من ادوية الحكومة 🙂

وتكتشف أنك دخلت مليء الجيب وخرجت متحمش ومصلوخ صلخ .

.

طيب وين الخلل :

1- الكوادر من أتعس الكوادر الطبية الي شهاداتهم كلها مقبول .

2- تنفيع التجار عن طريق ارغام الناس على الذهاب للمستشفيات الخاصه .

3- السرقات بالمناقصات الي يسوون منها 50% و ال 50% بالمية الثانية بجيب المقاول وبعد سنة المرفق متهالك ولايوجد صيانة ولا اهتمام .

4- غياب الرقابة والكفاءات في الإدارات الصحية .

.

طبعا ما أبي أسرد قصص ضحايا وزارة الصحه والمستشفيات الخاصه بالكويت لأن الراس بيصكه الشيب من اهوال القصص .

وسلامي للمصطافين في لندن وألمانيا ودعائي بالشفاء للمرضى الحقيقيين هناك .

.

Advertisements

23 تعليق

  1. جبتها على الجرح ,, لكن انا اقول نرجع للطب الشعبي والكي افضل
    فيك جرح بكتفك يجوونك من رجلك طيب لييييه ؟ يقولك علشان تلتهي بعوار رجلك وتنسى العوار الاساسي !!

    والله الحكومي زين نوعاً ما لكن الكادر مثل ما تقول خرطي
    الله يحفظها ويحظفكم ويحفظك من كل شر ,, ويبعدنا عن هالمستشفيات

    • والله الطب الشعبي ماوراه الا الفلس هالوقت
      كل ما طلعت عشبة بعد شهر وزارة الصحه تحذر منها وماتدري صج هالتحذير ولا غشامه

      خير ماتداويتم به شرطة محجم .. اعتقد الحجامه فيها علاج لكثير من الامراض على خلاف الكي

  2. والله شتقول شتتكلم يابوفلان !!!

    واحد من الاهل ودينا المستوصف من فترة >> و الدكتورة كان شكلها صغير (يعني توها متوظفة)

    ماقصرت معانا الله يسامحها العوار بالبطن عطتنا بندول و تقول مرتين باليوم لمدة اسبوع

    يلا شنو ردك ؟؟؟

    ولا عاد مرة كاتبيلي دواء آخذه من صيدلية المستوصف
    قالي الصيدلي: انت مين الي ادالك دي الورقة
    قام اتصل على الدكتور و كلمه

    الحين نفس هالمواقف منو المفروض الي يداريها و المسؤول عنها !!!

    • اوووه عاد المتدربات خذ وخل اشكثرهم

      وعلى فكرة طالب الطب مايقدر يتوظف بمستشفى خاص الا مع خبره سنتين واكيد بتكون بالحكومي وبيتدربون على الناس الا الفاهم منهم

  3. ما اقول إلا :
    حسبنا الله فيهم

    يعرفون كل شيء ولكن لا يتخذون اي اجراء ،، كل هذا على حساب المنفعة الشخصية

    اللهم اسألك ان لا يتهنى في المال الحرام كل حرامي وبلاع بيزة في الكويت

    اللهم آمين

  4. سلامات بوفلان
    لايكون حدتك الحكومه على الخاص

    وإسمحلي أعترض على مساواتك مرافقنا الصحيه مع الخليج

    • مو بس انا لو بروحي منحد مافي مشكله

      لكن الشعب كله شام ريحة الخاص او يضطر البعض للصبر على التشخيصات الخاطئة

      ليش وين احسن عندنا ولا عندهم ؟

  5. والله يابو فلان كلامك صحيح

    بس تره الخاص فيه الزين وبقولك سالفتي

    انا ولدي كله فيه كحه وكله يشرق واوديه الحكومي يكتبوله كمام وبعد اسويله كورسات كمام بالبيت ومافاد وياه..

    بعدين قررت اروح ” خاص ” دشيت عالدكتور شاف الولد وقالي سوله اشاعه تحت وتعال ( قلت بدأ النصب )

    رحت سويت اشاعه ورديتله شافها بطرف عينه حتى ماتمقل فيها (قلت يالحراميه )

    وعقب كتبلي على خمس إبر وكل إبره 10 دنانير يعني المجموع 50 دينار كلها بتروح بـ… ولدي ههههههه وغير حساب الممرض اللي بيعطي الابره

    حسيت ان طلعلي اذوون مع قروون هههههه وقمت اناهق ..

    بعد ماخلصت كورسات الابر ليومك الولد ماشاء الله لا إله الا الله بصحه ممتازة

    الحمدلله ماصرت اسمع كحته اللي اتعور القلب .

    • تصحيح :
      ماشاءالله لا إله إلا الله

    • سلامته الولد ومايشوف شر

      انا ما انسفهم نسف لكن في بعض الامراض بسيطه يروح يدبسك بمغذي وتحاليل واشعه وهي ما تستحق

      ولو تلاحظ ولا مستشفى حكومي يطلب اشعه للصدر في حال الكحه 🙂

      معناه يا الخاص يبون فلوس في كل مره يطلب اشعه او الحكومي يعطي العلاج بدون تحديد المشكله

  6. حاليا المستوصفات الحكومية اصبحت للخدم والوافدين اكثر من المواطنين ..
    ودخلونا للمستوصف يزيدك مرض اكثر مما انت فيه .. من طريقه دخولك وصف طابور هذا غير اللي يدخلنوهم قبلك خصوصا اللي يسوون روحهم مرضى حيل ويجلسون على كرسي المتحرك ..
    وهذا غير نفسية الدكتور .. جنك تطر منه الدوا ؟؟

    كل هالاسباب تخلي الواحد يشتري راحته بفلوسه ابرك ..
    والمستشفيات الخاصة .. اغلب علاجها سريع .. مع العلم انهم عارفين انه خطر على المريض .. لكن مثل ما قلت .. يشوف المريض مثل الصوره اللي انت حاطها . والمريض غافل المسكين .. يحسب انه يدري انهم يستغلونه بس بالمال .. ما يدري عنه صحته بعد ..

    موضوعك وايد حلو ابو فلان ..
    والله يعافينا كلنا .. ولا نضطر لا للمستوصفات ولا المستفيات

    • شكرا على المداخله

      طبعا تروحين المستوصف عشرين رقم جدامك 15 طبيات والباجي علاج 🙂

      الله لايبلانا بمرض

  7. اي والله صدق .. حسبي الله عليهم .. المستشفيات في العالم العربي للأسف من أسوأ المستشفيات .. وأحسنها هي من أنصب المستشفيات .. والدكاترة نادرا تلقى ناصحين
    واذا سوو غلط يغطي بعضهم على بعض وياكلها المريض او عائلته .. وكله يقولون يعني الدكتور مو بشر يخطي .. ايه يخطي بس مو اخطاء ما يسويها الجاهل .. مو اخطاء يكذب في تلفقيها ..

    حسبي الله ونعم الوكيل .. املنا بشباب الطب الجدد كبير

  8. المستشفيات الحكوميه ماتساعد لا تنظيم لا ارقام وزحمه ولا في كراسي بالانتظار الجو بروحه هناك يمرض اذكر اخر مره راجعت فيها مستشفى حكومي قبل 12

    انا مابي ادافع عن المستشفى الخاص بس اذا ماسوولك اشعه
    ولا تحاليل ولا فحوصات شلون تبيهم يشخصونك !!

  9. بالحكومة تعب للصحة والنفسية
    وبالخاص تعب للجيب
    🙂

  10. صاج 100%

    وأحلى شي الجمله الأخيره ؛)

    ((وسلامي للمصطافين في لندن وألمانيا
    ودعائي بالشفاء للمرضى الحقيقين هناك))

    قبل جم سنه كنت مسافره لندن بالصيف ولا أشوف وحده كانت علاج وسألت ليش عسى ماشر شفيها فلانه

    ولا يقولولي أبد سلامتج فيها >>

    فيها كحه بصبعه ويايه علاج!!!!!

    لووووووووووووووووووووووووووووووووووووووووووول

    كحه بصبعه شنو يعني أول مره أسمع بهالشي
    يعني مافيها إلا العافيه بس يااااحرام بخاطره تشوف لندن
    وإمكانياتهم ماتسمح بس واستطتهم تقدر تسفر لندن

    صج نعيش ونشوف العجب

    مع تحياتي
    ماشاءالله البوست عجييييب

  11. الحمدلله على الصحه و العافيه
    الله لا يحوجنا حق المستشفيات لا الحكومه و لا الخاصه 🙂

  12. والله حبيبي شقول وشخلي .. الولادة نشفتني 😀

  13. أخف الضررين تروح لدكتور عنده عيادة خاصة ويشتغل بالحكومي..
    ماراح تخسر إلا 30 ويمكن بس15 د.ك وهو يضبطك بالمستشفى..

    وعن العلاج برى الحين يدزون لفرنسا يعني عز الطلب للمصطافين..

    يعطيك العافية..

  14. لا حكومي ولا خاص، صير طبيب نفسك!
    أنا ما أراجع مستشفى إلا وعارف علتي ودواي والله يخلي الإنترنت.

  15. ابو فلان . بس انطرني 5 سنين على مااتخرج من هالكلية و أغير لك وضع المستشفيات الحكومية بإذن الله ,
    والله كل ما زهقت من الدراسة و شوي و اشق الكتب , اشوف وضع الاخطاء الكبيره و الغرور باللي بالدكاتره يكلم المريض جنه يطر منه .. أتشجع وأدرس لأن ابي اكون دكتور ماسك العلم الصح و الاساسي , اللي قال عنه الشافعي لولا انشغالي بالفقه لانشغلت بالطب ..

    وابشرك أغلب ربعي نفس تفكيري الحمدلله ..

    جني كتبت قصة حياتي , بس حبيت اقولك تفائل ترى ان شالله الوضع بيتغير ..

    دعواتكم لنا ..

    • فيكم البركه والله

      مافي شك ان في ناس غيورين ويخافون على الناس

      والله يثبتكم ويوفقكم ومانحتاج للوافدين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: