مطعم قيصر ساتشي .. SATCHi

.

قبل المعاشات بيوم بعد ماطولت المعاشات نزلوها مبجر الشهر الي قبله وطقينا اصبع هالشهر

المهم قبل المعاش بيوم عزمتني أم فلان رضي الله عنها لمطعم ساتشي

مطعم ساتشي : مطعم يقدم المأكولات الإيطالية واليابانيه ..

مكانه فوق سنتر بوينت بالفحيحيل وفيه بالسالميه ما ادله الصراحه

احلى مافي المطعم إنه فيه كباين تاخذ راحتك خاصة اذا بتوكّل مرتك من ايدك <<  هاذي سالفه راح أذكرها بآخر التدوينه !!

أول ماتدخل يقدمولك هالخلطة الي هي مكونه من طماط وبصل وزيت زيتون ومعاها شي ما أدري شنو المهم انه طعمها حلو إلى جانب الخبز والزبده

.

Picture 348

.

وبعدين عاد اييك المنيو وفيه مالذ وطاب من الاكل

.

Picture 374

.

وبعدها طلبنا المقبلات

اول شي سلطة القباقب واسمها “ سلطة كاني ” الي يروح المطعم يطلبها وانا أجزم وما ابي اقسم انه راح يدعيلي

سلطة طعمها خيالي وفوقها كافيار وفيها قبقب يعني نووي ايران ههههههههههه هذه الفقرة لمن هم فوق +18<<< اشفيه فوزية دريع

طبعا طلبنا سلطتين يعني ماعونين يعني صحنين فهمتوها ؟

وهذه صورتها

.

Picture 352

.

الطبق الثاني

لحم بقري رول محشي بصل أخضر

ماشاء الله الطبق حلو جدا وخفيف حق تطقطق ع الخفيف

.

Picture 365

.

الطبق الثالث

طبعا لي الحين بالمقبلات يعني مادخلنا بالعميق هههههههه اعوذ بكلمات الله التامه من كل عين لامه وشيطان وهامه 🙂

ربيان بالبطاط

الطبق ماعجبني صج الربيان كان كبير بس متروس دهن وطعمه عادي وسعره 5 دنانير

.

Picture 375

وبعدني طلبنا الأطباق الرئيسية

الاول ستيك بالمشروم طعمه حلو والمشروم طبيعي مو المعلبات واللحم طري جدا

.

Picture 363

.

الثاني ستيك بالفلفل الأسود نفس الي طاف بالطعم بس بنكهة الفلفل الأسود

.

Picture 357

.

وبس

حلويات ماطلبنا والمشروبات كانت حاضرة بس المصور ماصورها 🙂

,

تعال اشسالفة انه الواحد يوكّل زوجته

المسألة ماهي عيب ولا حرام بس الواحد لازم يعرف وين يسويها وجدام منو !!

يعني بالبيت بمطعم محد يشوفكم ايه

قبل جم يوم رحت مع الربع مطعم روبي تيوز دااي ولا أخ كويتي شباب معاه وحده نقول انها زوجته داش معاها المطعم ماسك ايدها جنها بتنحاش منه عاد انا معطيهم ظهري والشباب يتبوسمون يقولون اشفيه مصدق نفسه

وبعدين عرفت شمسوي الأخ

المهم قعدوا ع الطاوله طبعا شي اسمه قصر صوتك ماكو المره صوتها أعلى من الريال وسوالفهم كلها عندنا لو الواحد الاكل مو جدامه جان مركز معاهم انا ههههههههه

المهم يوم وصل الأكل كل واحد قام يلقم الثاني جنه الثاني مايعرف ياكل وجدام الناس وضحك وبطل حلجك وما ادري شنو !!

هالأشكال المفروض تفهم انه الرومانسية مو لازم الناس تشوفها يبا اقعد ببيتك شب شموع واخذلك شوكه وبطل حلجك خل يوكلونك مو جدام خلق الله !!

طبع هالإثنين يحليلهم وحده من الثنتين :

إما توهم مالجين وكل واحد يجامل الثاني باجر المره ببيتها بين أربع طوف والريال بالديوانيه اربع وعشرين ساعه

أو إنهم ربع لأن الولد قعد بالسيارة ورا مو جدام !! إمحق مرجله

بس مانقول إلا الله يستر ع المسلمين <<< باقي شي ماقلته 🙂

,

عاد نسيت أحطلكم تقييم المطعم

المكان 10/10

راهي ووسيع وكباين والدور الـ 11 يعني يطل على بحر الكوت والمنظر بالليل جميل جدا

جودة الاكل 10/9

الخدمه 10/9

السعر 10/8

لأنه المطعم كان أرخص اول مافتح وبعدين مع ارتفاع الأسعار ارفعوا الأسعار ومارجعوها يوم صارت الأزمه

,

واحد من الربع يقولي ليش كل موضوع تختمه لازم دعاء او آيه او حديث شنو خطبه إهي ؟؟!!

فا هالموضوع راح اختمه على قد عقله

خلصت القصه وملصت والديايه عنفصت أو كما يقولون ..

Advertisements

18 تعليق

  1. عيني عليك باردة بو عزيز ماشاء الله
    اصبحت الناطق الرسمي بإسم مطاعم الديرة ، وانا اذا بغيت اطلع المدام حق مطعم باخذ شورك
    بس احنا ما ينفع معانا الا العيوش لوووول شغل ستيك وهالحركات مايدور عندنا ، ولا في احد ياكل بيتزا بشوكة وسكين ؟ يعني ذرب الحبيب <<< طبعا مو انا 🙂

    بخصوص الحرمة الي سولفت عنها ويا زوجها . انت قلتها ( امحق مرجلة ) وللأسف ياكثرهم هالأيام بالديرة

    تحياتي

    • هلا بوناصر
      يبيلي مكتب دعايه واعلان
      اووووه العيوش عندي لك مطعم حق عزايم ومفاطيح تاكل اصابعك وراه بابوحليفه
      انت بس اذا عندكم مناسبه وفيها مفطح السالفه لايردك الا رقمي تراه شي

      اي والله ياكثرهم وبعضهم عوبه جدامها واحد وتخز الي وراه

  2. وصفك روعه يا بو فلان اذا ربي كتب وجيت للكويت ان شاء الله ابزور ها المطعم

    والمراة هي وزوجه يمكن حرية شخصية بس لوكان بقسم العائلات افضل من قدام الناس يعني يا يصيرون مضحكه او يصكونهم عين وبا الحالتين ماهم مستفيدين

    دامت شهيتك مفتوحه وبا العافيه

    • ياهلا فيج اخت شمس وحياج الله بالكويت

      الحريه الشخصيه موضوعها ثاني
      قلة الأدب امام الناس لاتعتبر حريه بل تجاوز للاعراف والعادات حتى لو كانوا في قسم عائلي

      وشكرا على الدعوه القويه 😦
      انا يبيلي تحزيم معده مو فتح شهيه 🙂

  3. عموما انت ختمت خطبتك بنفس الاسلوب قلت ( أو كما يقولون ) يعني فيك فيك هالاسلوب مهما تحاول هههه ..
    موضوع حلو ولذيذ كالعادة ، اللحم الرول شكله يشهي .. 🙂
    بس شخصيا التقييم مو 10/10 أنا اعطيه 8.5 – 7.5 / 10 ,, يعطيك العافية 🙂

    • الله يعافيك يا ديزل

      تعمدت الكلمه لأضرب عصفورين بحجر أشبع رغباتي هههههه << متعوب عليها
      وألجم الناقدين << حرب البسوس مو مدونه

      ذوقك يختلف بشيء بسيط وان كنت اراه اجمل من ذوقي خاصه باختيار تمبل ويد

  4. اول شي بالعافيه مع انها متأخره !

    ثاني شي يعطيك العافيه 🙂 وخووش مطعم شكله 🙂 و يبيله نزوره عن قريب

    ثالث شي هذا الي ابو يوكل مرته جدام الخلق والخلايق هذا الله ماكثر منه هاليومين ! بس ما اقول غير عيب على الزلم عيب ! ويا محلا المرء وهو عزوبي

    ويعطيك العافيه مره ثانيه

    • الله يعافيك يا اخ عجييييييب

      والمطعم يستاهل الزيارة الصراحه

      وعلى قولتك إكثروا بسبب تغير المفاهيم وتأثير المسلسلات كل واحد ماسك خصر خويته وداش معاها مطعم والاخ يبي يطبق الي شافه

      بس أخالف بسالفة العزوبية صحيح لها طعم خاص بس بعد الزواج راح تعافها

  5. بالصحة والعافية، الأطباق شهية جدا.

  6. عدنا ..
    لا لا سالفة الريال مع مرته امببببييييييه مو صج مو صج :p

    😀

  7. ما شاء الله .. عايش الرومنسية ..

    وين فلان ؟!!

    ولا خايف عليه من سلطة القباقب .. هههه

    بعدين ليش رايح على حساب أم فلان .. خو الـ 50 رديناها .. هههه

    خو _ صار لي 10 سنين ما قلتها ..

    يقول ساندبرغ :

    الحياة الزوجية كالبصلة .. قشرة بعد قشرة وليس وراء ذلك غير الدموع .

    (عزوبي محتر)

    • ياهلا ومرحبا

      فلان موجود تحت الطاوله مايعرف يقعد على طاولة الطعام لازم شغل أرضي

      وين الخمسين راحت أدراج الرياح شوف اذا فيه شي قديم أبيه منك

      افتح نوتت الديون يمكن عليك شي قديم

      خو كلمه أصلها فارسي أظن <<< بدا التأليف

  8. اممم

    حلوه التدوينه

    شوقتنا للمطعم

    صح اكيد كل شي له وقته

    رومنسيه جدام الناس

    يعني خلي اللي ما يشتري يتفرج

    هههههههههههههه

    انزين وربيعك اللي قالك ليش تحط ايه او حديث ام حكمه

    فهمت من كلامك انك خذته ع قد عقله

    يعني المفبروض تكون ما سمعت كلامه

    بس انا ما شفت اخر التدوينه اي شيء من هالقبيل

    ليكون سمعت كلامه؟

    لووووووول

    • هلا فيك أخوي أقصوصه

      فعلا وايد هالنوعيات بهالزمن اذا ماعندك تفرج

      أما صاحبي بالعكس أخذته على قد عقله وقلتله ” خلصت القصه وملصت والديايه عنفصت ” يعني نزلت لمستواه الي هو يبيه اذا مو عاجبته الآيه أو الحديث شلتهم وختمتها بالي يبيه

  9. ماشاء الله شكل الأكل يشوق

    ولا مره رحتله هالمطعم

    بالعافيييييييييييييية عليكم

    • المطعم عجيب أنصحج تجربينه

      وموقعه جدا ممتاز بس إخذي الكبينه الي عند الدريشة صوب البحر المنظر روعه خاصه بالليل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: