خط الوفره … والجو المنعش

مثل ماتعرفون الجو هالأيام بالليل عنيييييييف برااااااد والقعده بالبر وانت حاط الفرشه ومعاك القهوة والشاي والوجوه الطيبه أحلى أوقات يتمناها الرجل الخليجي <<< أم بي سي 3

طبعا كالعاده اتفقنا الشباب نضبط القعده والعشا وتوكلنا على الله والوجهه إلى ” خط الوفرة “

* خط الوفره للي مايدله ويبي يروح تصعد جسر مينا عبدالله جنك رايح الاصطبلات وتكمل سيده وراح أذكر أفضل مكان تقعد فيه .

رحنا مرتين لخط الوفره وبهالموضوع راح أدمج السوالف مالت الطلعتين لأن الأحداث متشابهه والعشا هو نفسه

عددنا 7 أشخاص انا والعامر والأنصاريه ( واحد منهم المره الثانيه ماحضر وراح أذكر السبب ) وأخوي عمر وحسين والعتيبي محمد والفيلجاوي بوبدر

طبعا الفرشه والقهوه الشغل العدل


P1030819


والقهوة ماتحلى إلا مع القيمات أيابااااااااه


20090924042


الجو الصراحه كان خيالي درجه الحراه 25 ولكن !!

المره الأولى قعدنا شوي جدام عند كيلو 10 يمكن وعلى الساعه وحده هبت علينا ريحة البواليع مما اضطرنا إلى مغادرة المكان والانسحاب التكتيكي

أما المره الثانيه قعدنا عند كيلو 21 طبعا المرتين نشوفلنا صعده وننزل الأغراض ,, ماياتنه ريحه وافتكينا شوي من اهل التقحيص والهدرزات ..

وبعد القعده والسوالف وشرب القهوة ضبطنا الجمر للعشا


P1030816


والعشا كان قصدير << القصدير عباره عن لحم مقطع صغار ويفضل لحم العجل لأنه أطرى وبطاط وبصل وومعجون طمام وبهارات وملح تصفهم بصحن قصدير وبعدين تلفه بورق قصدير عادي وتحكم الإغلاق عشان مايطلع البخار وتحطه على الجمر مباشرة

طبعا متعمد ماقلت ومشروم عشان بعض الناس ههههههههههه

وراح تاكل أصابعك ورااااه

أها ونسيت الخبز الإيراني وراسين بصل أبيض منقع بليمون أف أف أف اللهم لاتفتنا


وهذا العشاعلى الجمر صحنين


20090924046

وثانيه من الهليكوبتر


20090924047


وتخلون القصدير على النار لمدة 45 دقيقه وبعدين راح تشوف القصدير بدا ينتفخ لاتخاف واخذلك عود أسنان وعطه طقه وحده من فوق خله ينسم ع الخفيف <<<< والله الظاهر فتافيت بغارون من المدونه


وبعدين هاتك ياسوالف والتشلخ وضغاط الشباب واذا حسن مو موجود لازم الشباب ( يساسرون عنه هههههه) روح يالبدليات ياحسن يابو مدونه من قرية المطر المخفيه يعني ناروتو يعني أنيمي فهتمها ؟؟؟

المهم بعض الشباب يطوف هالوناسه والقعده الحلوه ويقعد بالبيت ولما تسأله ليش ماييت يقول والله انا مفتقد القعده بالبيت بروحي << لايكون التجاره ذابحتك وموقادر تقعد بالبيت

يقول قعدت اشوفلي جم فلم

وبعدين عاد يطيح العشا أياباااااااااه سمو يالله حيهم انطحوا فالكم بس لا أحد يتعور


20090925048


P1030821


وبعد العشا والشاي والتمغط تقعدلك بوساعه ونص وتمشي قافلا إلى بيتك للراحه ولكن هيهات هههههههه لازم بعض الشباب يخلونه نحرق الاكل االي أكلناه ونقعد نحفر وندز ونربط حبال ونهز طبعا الي يقرا هالكلام يقول أووووه مشغلين دقني وقاعدين نرقص


الشباب البعض منهم يحب المغامره والبعض من الغشامه هههههههههه يدخل بسيارته مسوي فيها شنب نفس شنب أبوفلان وبعدين يطبع وتعال انت لازم اتطلعه


وهذا الأخ راعي اللكزس بياخذ فوق تحت بالغرازات واطبعت السياره وقعدنا نص ساعه نشتغل ماكو حبل ماكو دز ماكو شي ماسويناه وآخر شي الأخ بوبدر قال ترا انا عندي قلص بس ابي الشباب يشتغلون الصراحه زين يسوي لانه في ناس ماتتحرك ولاتحط ايدها بشي يبي يحركهم


بس حنا الي كليناها ونفس الشي ماتحركوا بس واقفين فوق روسنا ويتحلطمون <<< الله يصغر كروشهم


20090924040


وبعدين اييك راعي التاهو وراد امريكا بوطقه خخخخخخخخخخخ ويسوي نفسه ترا انا قوي وعندي دبل وداش بوسط الغرازه ومو مشغل الدبل والعجيب انه دايس 140 وهو مكانه !! لين اقعدت السياره على الشاصي ويله الحين راح يطلع البطل ويدق الدبل وهو قاعد مكانه ههههههههههه وشغل الدبل الثقيل ويقوله استريح شوف انت شمسوي أول ههههههههههه


P1030823

P1030822


وطبعا أخوكم أبوفلان عنده يوكن بدون دبل بس كويتي أنفع حطو القلص وسحبناه بس بعد شنو بعد معابل نص ساعه نحفر ونهز وندز

وشلنا قشنا ورجعنا

الصراحه هالطلعات ماتتطوف فيها وساعة صدر وتنسيك الهم والدنيا خاصه مع الشباب الفله الطيبين


الله يجمعنا في جنته << الحين اييك واحد يقول انت مسويها خطبه ليش تدعي انت وين والتدوين وين


Advertisements

10 تعليقات

  1. الصراحه شكل الطلعه توحفه

    الله يسامحك يابو فلان يوعتنا واحنا صيام شكل

    القصدير يشوق يمي يمي ..

  2. والله اعرف وايد حريم يحسدونه على هالطلعات الي ماتكلف شي

    مو نفس طلعاتكم لازم سوق ومطعم وتشتري وبعدين تقول والله المعاش مايكفي

    الطلعه كلها كلفت 14 دينار يابلااااااش

    والله يتقبل الصيام

  3. عسى الله يهنيكم زود بزود
    بس ليش لحم عجل ( صعايدة ) انتوا 🙂 ،،، بالعافية
    افا مغرزين لوووول شهالجيوب الي مخرزة !! سويتوها نيسان صني
    طبعا اتغشمر ، وباين طلعة ممتازة ماشاء الله

    الله يهنيك دوم ودوم <<<< فيري ؟

    تحياتي

    • هلا بهورنت

      عيل صعايده هههههههه

      والله جربنا اللحم العربي ماضبط اييك عرد شوي

      وسالفة الصني والله هي على السايق لو صني يدخل منسم ع التواير يتمشى بس اذا الي قاعد ورا السكان يسووووق أما الغشيم حتى بالدبايه يغرز

      نورت يالحبيب

  4. ههههههههههههههههههههههه
    والله يا بوفلان تقرير رهيب عن السالفة 😀
    ولي عدة تعليقات:

    – أولا الله يجزاك خير على (عنوان) المقالة ، اللي كان من اختيارك بدون أي سرقات أدبية هههههههه
    – يا خوك جيك على بدلياتك قبل لا تنشر الموضوع، لانها مرات تضحك أكثر من الفكرة اللي تبي توصلها <<< لازم ننتقد عشان تتطور يا حبي ههههههههه
    – عجبتني صورة الفنيال والدله اللي شكلها يديده صح؟ هههههه
    – وبعدين شكو تمدح باللقيمات اليابسه اللي كسرت ضروسنا .. الله يخلي لقيمات أم عبود 😀
    – مشكور على هالموضوع الحلو.. وناطرين باجي مواضعيك
    بالتوفيق 🙂

    • هلا العبد

      طبعا احنا مانبوق من الصغار شي ننطرهم يقلدونا ويفتحون مدونه ههههههه ويسوولها اشهار بالاعلام
      ماكو بدليات الله يهديك بعدين مراجع وايد يمكن انت ماتعرف كويتي عدل بعد سوداني أكيد ماتضبط اللغه الكويتيه ههههههههه

      مرات يقولون شوف الظاهر وخلك من المضمون أهم شي اسمها قيمات

      وحياك الله بالمدونه الخضرا

      آآآآآآآآي يازول ههههههههه

  5. هههههههههههه سبحان الله الكبار دائما ينتقدون من قبل الصغار ، ما تقدر

    أما سالفة احمدو مع التغريزة فصلت عليها ..

    يعطيك العافية ، وفي الواقع أحب أشوف نجاح طلبتي 😀

    • عاد تصدق الصغار كله يقعدون بالبيت يشوفون بباي بروحهم ههههههههه

      عاد يقولون انك نفسية بالصف وماتعطي درجات شد حيلك ولا ترا الناظر مايعطيك امتياز

  6. طلعة جميلة ..

    أهم شي مع اللحم جبن قلاص ^^^ مزاج صعب ..

    يقول المنصوري :

    الـحـظ عجه والـجماعـة قراطـيس
    مـن يجمع القراطـيس وقـت العجاجي

    من يجمعهم ؟؟؟

    مفطح قريب يجمعهم ..

    : )

    • ههههههههههههههههه

      والله يالمنصوري ذبحتني من الضحك هههههههههههههههه

      اي والله جبن قلاص وشطه ولحم عجل يخرب بيت المزاج

      المفطح عن قريب راح تكون أصعب تدوينه بالتاريخ الكويتي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: