مطعم روبي تيوز داي أو ” ruby tuesday “


امممممممممم شقول شحجي ..

المطعم أمريكي يقدم الستيكات والمأكولات البحرية بالإضافه الى أطباق الدياي والباستا ..

موجود بالكويت عندنا في الأفنيوز ويم الأكوابارك وبمنطقة المهبوله هاذي الثلاث اماكن الي رحلته فيها <<< يعني ترا أكثر من مره رحتله


أفضل وقت للذهاب :

* بالنسبة لي راح أتكلم عن فرع المهبوله الي هو أكثر واحد أروحله الزحمه تكون من بعد الساعه 7 الى 9 يكونون الأجانب واااايد خاصة وأن المنطقه هناك متروسه أجانب وأجنبيات الاحياء منهم والاموات ..


المــكان :

* افضل فرع فيهم من حيث المكان والأوسع هو الي بجانب الاكوابارك وأصغرهم الي بالمهبوله ..

*لكن طاولاتهم راهيه والمكان في المهبوله هادئ لولا الأغاني الي تقث خاصة اذا كانوا داشين جو وزايدينها حبتين ..


جــودة الأكــــل :

* بصراحه انا أكثر شي أطلبه بحري وراح أحطلكم صور افضل الأكلات الي تطلبونها اذا زرتوه .. لكن بشكل عام الاكل ممتاوز جدا وطعمه خيالي بدون مبالغه

ما ذقت الى الآن أحلى من مقبلاته او بعبارة اخرى عنده أشياء تميًّز فيها عن غيره بعيدا عن التقليد << ترا متعوب عليها هالعبارة

وكمية الأكل ممتازه يعني يمكن طبقين من المقبلات يخليك تشبع ..


السعــر :

* مناسب جدا أرخص من أبل بيز وشيليز ووسابي <<< اما وسابي بكتب عنه تدوينه بطلع حرة الفلوس الي دفعتها فيه ..

* يعني تقريبا الثلاث أشخاص يطلع حسابهم 25 اذا ابطروا بالطلب وزادوها حبتين ..


الخدمــــه :

* راقيه يعني نفسيتهم مو خايسه نفس بعض المطاعم خاصة اذا الي يشتغلون من جنسية معروفه بالنفسية الي ودك تحذفه بالشوكه اذا شفته بس بعدين ماتقدر تاكل ههههههه <<< املق املق


المطعم باختصار أدمنته انا والشباب ومن حسن حظي انه المدام ماحبته ,, ليش من حسن حظي ؟؟؟


لأنك اذا رحت مع الشباب محد راح يحلف ويقول الحساب علي الا اذا واحد ابوه توفى وياله ورث !!

واذا رحت مع المدام لازم الشنب هو الي يدفع وانت ريال البيت وعيب تخلي مرتك تدفع ,, طبعا لأنني أروحله وايد فصار هالشي من صالحي


ولا المطاعم الثانيه لازم نودي وندفع مو عيب والبخل عموما غير ممدوح <<< ممدوح هذا مدرس مصري معانا ماسك المقصف من يوم انا بأولى ثانوي الى ان تخرجت من الجامعه ورجعت مدرس بنفس المكان وهو لي الحين ماسكه


الحين انيي حق أفضل الأطباق الي تطلبونها اذا رحتو المطعم :


المقبلات :

1– هذا الطبق إسمه ” تايفون شرمب ” شرمب يعني روبيان حق الي مايعرف انجليزي ( وهو احلى والذ طبق بالنسبة لي )

Picture 008

2– الصورة الثانيه فيها طبقين :

الأول الي ع اليسار يسمونه ” كراب كيك : يعني كيكة القبقب ” بصراحه لذيذه جدا

والثاني الي ع اليمين اسمه ” تايفون تندرز ” وهو عبارة عن أصابع دجاج مقلية مع الصلصة “


Picture 048


وهذا نفس طبق الدياي صورة ثانيه :


Picture 227



الحين انيي للأطباق الرئيسية :


بالنسبة لي ذقت الستيك في محلهم الي عند الاكوابارك ماعجبني لا انا ولا صاحبي بس في نقطة نظام ,, إما احنا ما احسننا اختيار نوع الستيك مثل ما انتوا عارفين فيه انواع كثيرة للستيك ويختلفون من حيث الحجم والطعم والطراوة والتتبيله ..

أو انه صج كان مو شي


بس آخر مره رحنا صاحبي طلب ستيك ريب آي كان طعمه ممتاز .. وهاذي صورة الستيك


Picture 225


وصورة أخرى


Picture 011



الطبق الاخير الي دائما أطلبه كطبق رئيس إسمه ” لويزيان شرمب “


وهو عبارة روبيان مقلي بالبقسطات لذيذ جدا جدا ..


وهذه صورته الله يرزقنا الحين بواحد لأني مو متعشي


Picture 222



بصراحه بعد هالأكل يبيلك شي تحلي فيه


ياسلام على هالكيكه صج لي قالو فتنه ..


Picture 038



أتمنى يعجبكم هالتقرير وترقبوا المزيد ففي الكرشه الكثير أقصد في الجعبه الكثير ..

Advertisements

21 تعليق

  1. مبروك على المدونة أولا
    والمطعم فقط مقبلاته حلوة أما الستيك تعبان كذا مرة أطلبه وهم تعبان ، أما لما ضربت معاك وصاحبك فأظنها حظ لووول

    خوش مدونة وانت دمك خفيف <<احم ، بس لا تكتب عن الاسهم

    • حبيب يالأنصاري والله يبارك فيك

      طبعا انا ذكرت انه الستيك عنده مره يصيب ومره يخيب

      فالأفضل إنك ماتطلبه

      اذا تبي الستيك روح للمطعم الي يالموضوع الي قبله وراح تدعيلي

  2. حلو حلو

    خبير مطاعم واسهم بعد !! ماشاء الله عليك 🙂

    الظاهر بستشيرك في انواع المطاعم لي بغيت اروح

    مشكور على الموضوع

    • هلا بهورنت

      يامعود اي اسهم اي بطيخ انا يالله شايل عمري 🙂 نشير واذا ماصاب نصبر عليه لين يرتفع

      وحاضرين اي مطعم تلفوني عندك بعد

  3. جربته مرة، ما عجبني أكلهم
    حسيت كأنه أقل قواطي أو معلبات جاهزة قالينها ..

    • هلا بمتزوج ثلاث عيل الي بموضوعك الاخير يقول أحسك مو متزوج إلا وحده والله مت من الضحك

      والله انت اخبر لولا إختلاف الناس لبارت السلع

      يمكن الأطباق الي طلبتها ماضبطت معاك او يمكن ذوقك مايمشي معاه هالشغل

      يعني الي مجرب مطاعم البواخر ولندن راح يشوف الي عندنا اكل قطاوة ههههههههههه

  4. آآآآآآآآه يا بوعزوز .. توني قايم من النوم واشوف موضوعك
    وعصافير بطني ماتت هههههههه

    أحلى شي دايما في المطاعم جودة الأكل والسعر المناسب
    ولما الحين متحمس حق ستيك “تشوبر” خخخخخ

    وعلى فكرة: نسيت لا تكتب عن عضوية المطعم ونظام الكوبونات..
    وعندي لك فكرة حلوة لو تسويها بنهاية كل مراجعة تسويها
    وهي انك تحط لك تقييم من خمس نجوم وتعطيه 🙂
    يعني روبي تيوزدي جم نجمه تعطيه؟

    وموفق ان شالله 🙂

    • منور يالحبيب

      لو ادري جان عزمنك بس مو اليوم خخخخخ

      مايصير اكتب عن كل شي مره وحده لازم شوي نسوي اكشن

      والفكره حلوه طرت علي بس اني احط تقييم بالارقام يعني من عشره نفس طريقة افلام هوليوود <<< اشفييييه

      بس سالفة النجوم يمكن احسن

  5. لوووووول ابو فلان كل المواضيع عن الاكل

    عيل لازم تغير اسم المدونه و اتسميها مدونة ابو فلان للمتان خخخخخ

    ويعطيك العافيه

    • والله أختي توته انا ريال ما أحب الأفلام ولاالتمثيليات ولا المسرحيات ولا الفراره بالمجمعات فالواحد يطلع حرته بالأكل

  6. بالف عافيه عليكم … و جـزآك الله خيـــر على الموآضيع الحلـو << تدور مطآعم حلوه هع هع

    وبالتوفيق …….

    على فكره ..

    عجبني التصوير مآشآء الله شييييييييييي …

    • الله يعافيج

      التصوير من الآيفون ترا خووووش تلفون <<< دعايه ببلاش

      بس اهم شي اختيار الزاوية واتجاه الضوء يعني يعتمد على المصور <<< كلش مامدحت نفسي

  7. بالهناء والشفاء

    بس نصيحة لوجه لله .. لا تاخذ أبو ساعة ذهبية معاك .. أكيد أنت ألي دفعت الفاتورة .. خخخخخ ..

    وبعدين في ملاحظة بسيطة .. سكين المطعم هاذي مو حق تاكل فيها ..

    حق رقي طال عمرك ..

    أظنها بالصورة الأولى ..

    أنا من ناحيتي والله ما أحب الأفلام ولاالتمثيليات ولا المسرحيات ولا الفراره بالمجمعات ولاالمطاعم والأكلات …

    فأحط حرتي بتاير السيارة .. ههههههههه

  8. بالعافيه مطرح ما يسري ******

  9. شكله خوش مطعم 🙂

    يعطيك الف عافية

  10. ياليت تقولون أين يوجد الموقع

    وهل السعودية يوجد بها

    أرجوا تحديد المدينة والمكان

    • المطعم موجود في منطقة المهبلوة عندنا في الكويت

      وبالأفنيوز ومجمع 360 وغيرهم ولكن هاذي الأشهر

      بالنسبة للسعودية الله أعلم فيها أو لا

  11. يعطيك العاافيه وعليكم بالعافيه

    بس ياليت لو تكتب بالتقارير الجايه كل طبق وسعره

    او سعره التقريبي

    عساك على القوه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: